الأربعاء، 26 ديسمبر 2012

تجليات مصرية 3 (العنب ….البانجو مش بتاعي)



كعادتي كل يوم اركب الميكروباص من الهرم ليوصلني الي مكان عملي بالتحرير …..جلست اقرأ في امان الله اذكار الصباح و انهيتها بسرعة لان الشيخ عبد الباسط كان يقرأ الجزء الاخير للقران الكريم في مذياع السيارة ثم تلي ذلك دعاء ختم القران و اسلمت نفسي للتحليق في اجواء هذه اللحظة الايمانية الممتعة و فجأة و بدون سابق انذار قام السائق بوضع شريط بالكاسيت و سمعت ما كانت اذني تتمناه في هذه اللحظة بالطبع حضراتكم سوف تقولون انه شغل ادية للشيخ النقشبندي او نصر الدين طوبار
لا اخواني الافاضل لقد شغل ما يطلق عليه اغنيه بتقول العنب احمر و اخضر و اصفر ينفع في شتي او صيف
اي و ربي هذه كلمات الاغنيه و بعد ذلك كلمات و تركيبات لفظية لا تمت لبعضها البعض بصلة مع موسيقي افراح صاخبة فقمت بالاعتراض و قلت له يا اخي شغلنا حاجة نفهمها جائني صوته الاجش قائلا: امال ايه ده يا استاذ بلاش الشريط ده يا عم انا هاشغلك شريط (وصاية) قالي كده بالحرف و انتظرت
و جدت انسانا مثلي و مثلكم بيغني و يقول البانجو مش بتاعي انا اصلا ما باشربهوش اه و الله هذه كلمات الاغنية و تحكي عن شاب جالسا مع اصحابه و كانوا بيشربو بانجو (تخيلوا) و حاولوا يقنعوا زميلهم بالشرب و لكنه رفض و اصر علي الرفض و حصلت (كبسة) و اصحابه هربوا و سابوا له كل حاجة و قبض عليه البوليس عشان كده انشد رائعته ( البانجو مش بتاعي انا اصلا ما باشربهوش )
الله علي القصة الرائعة التي ترسخ في اذهان ابنائنا و شبابنا البعد عن المخدرات ملحمة نعم ملحمة مثل الاوديسة و الالياذة
طبعا انا مش هاقدر اكمل لكم ايه اللي حصل لانه اعاني من شرخ في ذراعي الان نتيجة محاولة التحاور مع السائق اللي كان بيسمع القران من ربع ساعة عموما جت سليمة
و وداعا للرقابة و المصنفات علي مثل هذه النوعية من الاشرطة
الجيزة 28/8/2006
قبل خمس سنوات من ثورة الغضب
و مازال الفن الهابط مستمرا

ليست هناك تعليقات:

إرسال تعليق